Նարե Պետրոսյան. գիտության և արվեստի խաչմերուկում

Օձունից Նարե Պետրոսյանը դեռ մանկուց հետաքրքրվել է կենդանիներով, ինչը տարիների ընթացքում վերածվել է մասնագիտական կողմնորոշման։ Այսօր նա կեսանաբանություն է ուսումնասիրում ԵՊՀ-ում։

«Ուզում էի իմանալ, թե ինչպես է ամեն ինչ գործում բնության մեջ, մասնավորապես՝ կենդանի օրգանիզմների անատոմիական կառուցվածքը մանրադիտակային մակարդակում»,- պատմում է Նարեն, ով դպրոցական տարիներին սկսել է բզեզներ, թիթեռներ և այլ միջատներ հավաքել ու ուսումնասիրել։

Կենսաբանությունից բացի նոր ոլորտներ փորձելու հնարավորություն նրան տվել է ՔՈԱՖ-ի՝ Յուրեջյանի անվան ՍՄԱՐԹ կենտրոնը, որտեղ Նարեն մասնակցել է տասը ծրագրի, փորձել իրեն տարբեր ուղղություններում և բացահայտել նոր կարողություններ։

«ՍՄԱՐԹ-ը հնարավորություն տվեց բացահայտելու իմ թաքնված տաղանդներն ու բարելավելու հաղորդակցման հմտություններս և ավելի լավ աշխատելու թիմում»։

Նրա կյանքում գիտությունը, սակայն, միակ հետաքրքրությունը չէ։ Ծնողները նկարիչներ են, և արվեստը մանկուց շրջապատել է նրան։ Վերջին երեք տարիներին Նարեն և քույրը՝ Վերգինեն, մասնակցել են «Վահէ և Լյուսի» արվեստի մրցույթին՝ տարբեր անվանակարգերում ստանալով մրցանակներ։

Ստացած դրամական պարգևով նա գնել է ինքնաթիռի տոմս և մեկնել Էստոնիա՝ ուսումը շարունակելու։

«Մեկ կիսամյակ սովորել եմ Տարտուի համալսարանում։ Օտար երկրում սովորելը ոչ միայն ակադեմիական, այլև անձնական կարևոր փորձ էր»,- ասում է Նարեն, ում երկարաժամկետ նպատակը Ճապոնիայում սովորելն է։

Նրան հատկապես հետաքրքրում է լաբորատոր պայմաններում ցողունային բջիջներից հյուսվածքների աճեցումը, քաղցկեղի զարգացման մեխանիզմներն ուսումնասիրող գիտական հետազոտությունները և այդ հիվանդության դեմ պայքարի նոր հնարավորությունները։