Լուսինե Ազարյան. ՍՄԱՐԹ-ի շտապ օգնությունը
Անծանոթ մեկը, ՍՄԱՐԹ-ում տեսնելով ամենատարբեր աշխատանքներում ներգրավված Լուսինեին, միանգամից չի կռահի. ի վերջո ինչո՞վ է նա զբաղվում կենտրոնում։ Միայն բուժօգնություն ցուցաբերելիս հագին սպիտակ խալաթն է, որ մատնում է նրան։
ՍՄԱՐԹ-ի անփոփոխ բուժքույր վանաձորցի Լուսինե Ազարյանը, երբ 2019 թվականին աղջկա դասարանի հետ շրջայցի եկավ կենտրոն, զգացողություն ուներ, որ հարազատ տանն է։
«Ամեն ինչ այնքան ջերմ էր ու հարազատ, որ շրջայցից մի քանի օր հետո մտա ՔՈԱՖ-ի կայքը ու սկսեցի ուսումնասիրել, հույսով, որ բուժքրոջ կամ մանկավարժի թափուր հաստիք կգտնեմ ինձ համար»,- իր մշտական պայծառ ժպիտով հիշում է Լուսինեն։
Հաստիքը գտնվեց, և Լուսինեն, թողնելով ընտանեկան փոքր բիզնեսը, նախընտրեց բուժքրոջ պրակտիկան վերսկսել, մանավանդ, որ աշխատանքը երեխաների հետ պետք է լիներ, ինչը ինքը ամենից շատն է սիրում։
«Չկա մի օր, որ ես ստիպված գամ աշխատանքի։ Բոլորը զարմանում են՝ որտեղի՞ց ինձ այսքան էներգիա. եթե անկեղծ՝ ես էլ չգիտեմ։ Ես լիցքավորվում եմ երեխաների ու գործընկերներիս հետ շփումից»,- անկեղծանում է Լուսինեն, ով ՍՄԱՐԹ-ում անցկացրած վեց տարիների ընթացքում հասցրել է մասնագիտական աճ ունենալ, նոր հմտություններ ձեռք բերել, ծանոթանալ շահառու համայնքների խնդիրներին և վաստակել գործընկերների, շահառուների սերն ու հարգանքը։
