ՔՈԱՖ-ը գալիս է Սյունիք՝ մեկնարկելով անգլերենի ուսուցիչների մենթորության ծրագիր
Ավելի քան երկու տասնամյակ ՔՈԱՖ-ը ձեռնամուխ է լինում Հայաստանի գյուղական համայնքների զարգացմանը՝ ընդլայնելով հնարավորությունները, հզորացնելով սերունդներին և ճանապարհ հարթելով դեպի պայծառ ապագա։ Այսօր ուրախությամբ հայտնում ենք մեր առաքելության կարևոր մի հանգրվանի մասին․ ՔՈԱՖ-ը պաշտոնապես ընդլայնում է համայնքների զարգացմանն ուղղված ծրագրերի աշխարհագրությունը՝ գնալով Սյունիք։
Հ. Հովնանյան ընտանեկան հիմնադրամի առատաձեռն աջակցության շնորհիվ ՔՈԱՖ-ը Սյունիքում սկսում է իր առաջին կրթական նախաձեռնությունը՝ «Անգլերենի ուսուցիչների հզորացում․ մենթորության ծրագիր»-ը։ Այն իրականացվելու է Գորիսի ու հարակից բնակավայրերի անգլերենի ուսուցիչների համար՝ դառնալով մեր «այցեքարտը»՝ Գորիսի և Կապանի ՍՄԱՐԹ կենտրոնների կառուցումից առաջ։
Ինչո՞ւ է սա կարևոր
Կրթությունը մշտապես եղել է ՔՈԱՖ-ի առաքելության կենտրոնում։ Տարիներ շարունակ հիմնադրամը համայնքներում զարգացրել է թե՛ ֆորմալ և թե՛ արտադպրոցական կրթությունը՝ այդ թվում գործարկելով անգլերենի նորարարական ծրագրեր և ստեղծելով անգլերենի դասագրքեր, որոնք այսօր կիրառվում են հանրապետության ավելի քան 600 դպրոցում։ ՔՈԱՖ-ի ջանքերով հարյուրավոր ուսուցիչներ վերապատրաստվել են միջազգային փորձին համահունչ մեթոդներով՝ դասավանդումը դարձնելով ժամանակակից ու պահանջված։
Գորիսում իրականացվող մեր նոր ծրագիրը կներառի՝
- անգլերենի եռամսյա արագացված դասընթաց ուսուցիչների համար,
- յոթ մենթորի վերապատրաստում Հայաստանի ամերիկյան համալսարանի դասախոսական կազմի կողմից,
- մենթոր–մենթի համագործակցություն՝ ներառյալ դասալսումներ, քննարկումներ և համատեղ դասավանդում,
- ամփոփիչ համաժողով, որի ընթացքում ուսուցիչները կներկայացնեն ծրագրի ընթացաքում իրենց ունեցած ձեռքբերումները, կկիսվեն փորձով և նորարարական մեթոդներով։
Ծրագիրը կխթանի հանրակրթական դպրոցների 14 ուսուցչի մասնագիտական կարողությունների զարգացումը՝ ուղղակիորեն ազդելով նաև հարյուրավոր աշակերտների ուսումնառության որակի բարձրացմանը։
Կրթական ներուժի ամրապնդում Սյունիքում դասարանից այն կողմ
ՔՈԱՖ-ը նախատեսում է այս ծրագրին զուգահեռ Սյունիքում հանդես գալ նոր ձեռնարկներով, որոնք միասին կծառայեն որպես կամուրջ տարածաշրջանում ավելի լայնածավալ նախաձեռնությունների իրականացման ուղղությամբ։ Եվրամիության հովանավորությամբ և ՀՀ կառավարության աջակցությամբ ՔՈԱՖ-ը երկու նոր ՍՄԱՐԹ կենտրոն կբացի Գորիս և Կապան քաղաքներում։ Այս նորարարական կենտրոնները կդառնան համաշխարհային մակարդակի արտադպրոցական կրթության, ստեղծարար ծրագրերի և համայնքային ներգրավվածության հարթակներ՝ Հայաստանի հարավային գյուղերը կապելով ավելի լայն հնարավորությունների հետ։
Դեպի ավելի կայուն ապագա
«Սա մեր առաջին քայլն է Սյունիքում և կարևոր նախադրյալ այն լայնածավալ փոփոխությունների, որոնք սպասվում են առաջիկա տարիներին»,– նշում է ՔՈԱՖ գործադիր տնօրեն Լիանա Ղալթաղչյանը։
Սա ավելին է, քան պարզապես անգլերենի իմացության կամ դասավանդման հմտությունների ամրապնդում․ մենթորության այս ծրագիրը նորարարության, կապերի և հնարավորությունների սերմանում է։ ՔՈԱՖ-ի մուտքը Սյունիք մեր առաքելության կարևոր հանգրվաններից է, որի արդյունքում ավելի շատ համայնքաբնակ երեխաներ ու ընտանիքներ կկարողանան օգտվել ՔՈԱՖ-ի վերափոխող ծրագրերից։
Սա դեռ միայն սկիզբն է:
