Ստեփանակերտից 3-ամյա Մարիան մի քիչ «մոլորվել» է ժամանակի ու տարածության մեջ։ Բայց մի հասցե նա լավ է հիշում՝ գյուղ Հացիկ։
Սեպտեմբերին Արցախից բռնի տեղահանվելուց հետո Մարիայի ընտանիքը հաստատվել է Արմավիրի մարզի Բաղրամյան գյուղում։ Շաբաթը երկու անգամ նա հայրիկի ուղեկցությամբ հաճախում է ՔՈԱՖ-ի Հացիկի Երեխայի և ընտանիքի կենտրոն ու մասնակցում մանկան զարգացման անկյան պարապմունքներին։
Կենտրոնում նա ընկերների հետ շփվում է արցախյան բարբառն ու իր սովորած գրական հայերենն իրար խառնելով։ Մանկան զարգացման անկյան հոգեբան Ռուբինան կատակով ասում է, որ Մարիան իրենց հետ խոսում է «պարզեցված բարբառով»։ Արդեն բոլորը գիտեն, նա միշտ իր կարծիքն ու դիտարկումներն ունի, անկաշկանդ արտահայտում է դրանք։
«Եթե հանկարծ խմբում մեկը տխուր է կամ հուզված, Մարիան անպայման մոտենում է ու փորձում հետը զրուցել»,-ասում է Ռուբինան։
![](https://www.coaf.org/wp-content/uploads/2024/02/53486393061_f9abb2dbd2_o-1024x683.jpg)
Մարիան Ստեփանակերտի իր ծննդյան տոնի լուսանկարներն է ցույց տալիս ու թվարկում այնտեղի իր ընկերների անունները։
![](https://www.coaf.org/wp-content/uploads/2024/02/53486805520_3bfa3274fd_o-scaled.jpg)
Մարիան իհարկե գիտի «ոսկե ձկնիկի» հրաշագործ ունակությունների մասին, բայց, այնուամենայնիվ, ձուկ որսալուց նա նախընտրում է վարդագույնը։
![](https://www.coaf.org/wp-content/uploads/2024/02/53485486742_6a24e5247e_o-scaled.jpg)
3-ամյա արցախցին հասակակից ընկերների համար երբեմն «ռուսերեն է հնչում», բայց խաղը ջնջում է բոլոր լեզվական պատնեշները։
![](https://www.coaf.org/wp-content/uploads/2024/02/53485486382_6d73fd9456_o-1024x683.jpg)
Մարիան ասում է, որ ինքը ինքնագլոր (սամակատ) ունի և չունի, քանի որ այն Արցախում է մնացել, ինչպես և նրա խաղալիքների մեծ մասը։ Նա մի քիչ մոլորվել է «մեծերի աշխարհում»։
![](https://www.coaf.org/wp-content/uploads/2024/02/53486534903_49fea605c5_o-scaled.jpg)
Մարիայի լավագույն խաղընկերներն ու «հանցակիցներն» ավագ եղբայրներն են։
![](https://www.coaf.org/wp-content/uploads/2024/02/53486393286_d6865317ee_o-1024x683.jpg)
-Շնչի, հիմա քիչ շնչի (արտաշնչի),- այսպես Մարիան օրը մի քանի անգամ «լսում» է հայրիկի սիրտը։
![](https://www.coaf.org/wp-content/uploads/2024/02/53485485882_01c89194f7_o-1024x683.jpg)
Մարիան մայրիկին վրդովված պատմում է, որ տիկնիկ Մաշան էլի հիվանդացել է, ու ինքը ստիպված է դիմել ռադիկալ քայլերի և սրսկել տիկնիկին։
![](https://www.coaf.org/wp-content/uploads/2024/02/53486534798_4560d4ab0d_o-1024x683.jpg)
Արքայադուստրն ու հավատարիմ ասպետները։
Հեղինակ՝ Քնար Բաբայան