Եթե շուրջ բոլորը լեռներ են, աղբյուրից խմած ջուրը սառնորակ, իսկ ուր աչք եք ածում, քյալամի (կաղամբ), փուրչուլուխի (գազար) ու կառտոլի (կարտոֆիլ) բոստաններ են (բանջարանոց), ուրեմն Շիրակի մարզի Սառնաղբյուր գյուղում եք:
Եթե շուրջ բոլորը լեռներ են, աղբյուրից խմած ջուրը սառնորակ, իսկ ուր աչք եք ածում, քյալամի (կաղամբ), փուրչուլուխի (գազար) ու կառտոլի (կարտոֆիլ) բոստաններ են (բանջարանոց), ուրեմն Շիրակի մարզի Սառնաղբյուր գյուղում եք:
Այստեղ լայն ժպիտով Ձեզ կասեն` բարո՜վ եք էգե մեր գեղ:
Սառնաղբյուրն իր լեռներից ու սառնորակ աղբյուրներից բացի հայտնի է նաև թոնրագործ վարպետներով: Այստեղ տուն չկա, որ թոնիր չունենա:
Մոտ 3500 բնակիչ ունեցող գյուղում աշխատում են բոլորը՝ կանայք՝ տնամերձ հողամասում, իսկ տղամարդկանց 90 տոկոսն արտագնա աշխատանքի է մեկնում Ռուսաստան:
Ասում են՝ այս տարի բանջարանոցներն ու այգիներն առավել խնամված են, քանի որ փակ սահմանների պատճառով խոպանչիների մեծ մասը մնաց գյուղում:
Տեսարան գյուղից:
Համավարակի պատճառով Սառնաղբյուրի երեխաներն այս տարի մնացին առանց ամառային ճամբարների: Երեկոյան ժամերին մայլի (փողոցի) երեխաներով հավաքվում են «Բադերի որսորդներ» խաղալու:
6-ամյա Էդգարը շտապում է ընկերների հետ հեծանիվ քշելու:
Մնացական պապը խմելու ջուր է հավաքում աղբյուրից: Գյուղի ներքևի մի քանի թաղի խմելու ջուրը ժամով է:
Գազարի և կաղամբի մարգեր: Այստեղ այն շատ են աճեցնում և օգտագործում, ինչպես և ցանկացած հյուսիսային բնակավայրում:
Էթել տատը ձմռան համար ծիտրոն է չորացնում: Այստեղ այն շատ են օգտագործում տարբեր ճաշատեսակների հետ:
Սառնաղբյուրում արդեն խոտի ձմռան պաշարը դիզել են:
Գայանե Մելքոնյանն ինը հոգուց բաղկացած ընտանիքի համար ամիսը մեկ անգամ 60-70 լավաշ է թխում:
Արևածաղիկը Սառնաղբյուրում բազմաֆունկցիոնալ բույս է: Այն հիմնականում ցանում են լոբու մարգերում, որպեսզի լոբու ծիլերը փաթաթվելու տեղ ունենան:
Նարինե Մելքոնյանն ազնվամորի է հավաքում մուրաբայի համար: Նա արդեն հասցրել է այգու մրգերից մուրաբաներ եփել ու չիր պատրաստել:
Անասնապահությունը սառնաղբյուրցիների հիմնական զբաղմունքներից մեկն է:
