Եթե հասցրել եք Լոռու ՔՈԱՖ ՍՄԱՐԹ կենտրոնով երբևէ շրջայց անել, հավանաբար նկատած կլինեք կենտրոնի տարբեր ծրագրերի համար նախատեսված սենյակներն ու անկյունները՝ լի ուսանողների աշխատանքներով։ Եթե շրջայցերի ժամանակ կենտրոնը երբեմն դատարկ է լինում՝ ուսումնական ընթացքին չխանգարելու համար, դասերի ընթացքում ՍՄԱՐԹ-ում ակտիվ եռուզեռ է․ հարյուրավոր ուսանողներն ու շուրջ 2 տասնյակ ծրագրավարներն իրենց բուռն քննարկումներով ու ստեղծագործական աշխատանքով։
ՍՄԱՐԹ-ում այժմ շաբաթական 28 համայնքից 1800-ից ավելի ուսանող է հաճախում։ Ճանաչե՛ք նրանցից մի քանիսին։
Ապագա թավջութակահար Ժորա Մակինյանն արդեն 8 տարի է, ինչ զբաղվում է իր սիրելի գործիքով՝ թավջութակով։ Ժորան ՍՄԱՐԹ հաճախում է Ալավերդուց։ Իր բազմազան ուղին ՍՄԱՐԹ-ում մեկնարկել է 2019-ից ու անցել Ծրագրավորում, Թվային նկարչություն, Մարքեթինգ, Երաժշտական գործիքներ, Յոգա, Չինարեն ու այժմ էլ Նկարչություն ծրագրերով։ «ՍՄԱՐԹ-ն ինձ սովորեցրել է նպատակներ ունենալ ու հասնել դրանց»,- ասում է նա։
Եվա Հարությունյանը դեռ 3 տարեկան էր, երբ սկսեց հաճախել ՍՄԱՐԹ-ի Մանկան զարգացման անկյուն։ Խաղերից կրթական ծրագրերին անցումն իր մոտ շատ սահուն ստացվեց։ Ուզում է նկարչուհի դառնալ, ու ՍՄԱՐԹ-ում մասնակցել է Նկարչության, այժմ էլ Թվային նկարչության ծրագրերին։ Եվան իրենց տան 5 աղջիկներից մեկն է ու կենտրոն հաճախում է իր 3 քույրերի հետ։
Լիոնել Մեսսիին երկրպագող ու ֆուտբոլիստ դառնալ երազող Արտյոմ Բեժանյանը Օձունից է՝ գյուղ, որն ըստ իրեն, չնաշխարհիկ բնություն ունի՝ հատկապես աշնանային եղանակին։ ՍՄԱՐԹ կենտրոնում Արտյոմն այժմ մասնակցում է ՎԻ ֆիթնես ծրագրին ու հասցրել է ավարտել Պար ու Ֆինանսներ ծրագրերը։ Ֆինանսնե՞ր ու սպո՞րտ․ ասե՛ք, որ ապագա ֆուտբոլիստի համար կարևոր հմտություններ են։
Օձունից Մարի Սարգսյանը շատ է սիրում ինքնակենսագրություններ կարդալ ու ՍՄԱՐԹ-ում ՍՄԱՐԹամեջ հանդիպումների ընթացքում հանդիպել ոլորտի տարբեր մասնագետների ու ճանաչում ունեցող անձանց հետ, ծանոթանալ նրանց կյանքի պատմությանն ու փորձառությանը։
Ֆիզիկական ակտիվությունը կարևոր է յուրաքանչյուր տարիքում։ Այդ մասին կհավաստիացնի 11-ամյա Գոռ Ներկարարյանը, ով հաճախում է ՍՄԱՐԹ կենտրոնի Յոգա ծրագրին։ Ասում է՝ մարզումների շնորհիվ ինչպես իր, այնպես էլ իր շատ ընկերների մեջքն այլևս չի ցավում։
Տանը, թե ՍՄԱՐԹ-ում Մանե Գրիգորյանը կիթառ է նվագում։ Երաժշտական գործիքներն կենտրոնում մասնակցած իր արդեն 7-րդ ծրագիրն է։ Սիրում է ՍՄԱՐԹ-ի ազատ միջավայրը, ընտրություն կատարելու ու նոր ընկերներ ձեռք բերելու լայն հնարավորությունները։
Մեխանիկա ծրագրի ընթացքում 12-ամյա Տարոն Պետրոսյանն ու իր ընկերները SolidWorks ծրագրով սովորում են՝ ինչպես ստեղծել ժամանակակից ոճով շախմատի քարեր։ Տարոնը վաղեմի ՍՄԱՐԹացի է, կենտրոն հաճախում է Վանաձորից։ «ՍՄԱՐԹ-ում ինձ ամենաշատը դուր է գալիս, որ ծրագրերն ինքներս ենք ընտրում ու արդյունքում սովորում այն, ինչ մեզ հետաքրքրում է, ինչ հոգեհարազատ է»,- ասում է նա։
14-ամյա Սոֆի Սարգսյանը սիրում է ամեն բան, որ կապված է բնագիտական ոլորտի հետ։ Պատահական չէ, որ ՍՄԱՐԹ-ում իր սիրելի ծրագիրը Մեխանիկան է եղել։ Այժմ մասնակցում է Ծրագրավորմանը ու կարծում, որ անկախ ծրագրից՝ ՍՄԱՐԹ-ի կրթակարգը նպաստում է երիտասարդների բազմակողմանի զարգացմանը։ «Ցանկացած բան, որ սովորում ես, օգտակար է»,- ասում է նա։
ՍՄԱՐԹ-ում դասավանդվող օտար լեզուներից մեկը չինարենն է, չինարեն սովորողներից մեկը՝ 10-ամյա Նարեկ Հովսեփյանը։ Հիերոգլիֆներ պատկերելն ու չինարեն երգեր սովորելը ծրագրում իր սիրելի զբաղմունքներից են։
