Ոգեշնչող նորություններ Լոռու Դսեղ գյուղից. հուլիսի 15-ին պաշտոնապես բացվեցին ՔՈԱՖ-ի կողմից կառուցված առողջության կենտրոնի դռները։ Սա կարևոր նշաձող է, որն ընդգծում է հիմնադրամի շարունակական հանձնառությունը՝ բարելավելու առողջապահության ոլորտը Հայաստանի գյուղական համայնքներում։
Բացման արարողության միջոցառմանը ներկա էին ՀՀ առողջապահության նախարար Անահիտ Ավանեսյանը, Լոռու մարզպետ Արամ Ղազարյանը, կառավարության, Դսեղի և հարակից համայնքների ներկայացուցիչներ, ՔՈԱՖ-ի գործադիր տնօրեն Լիանա Ղալթաղչյանը։
Դսեղի առողջության կենտրոնում ՔՈԱՖ-ը, Հայաստանի Հանրապետության առողջապահության նախարարության հետ համատեղ, իրականացնելու է առողջության առաջնային օղակի բարեփոխման պիլոտային ծրագիր, որի նպատակն է գյուղական համայնքների բնակչության համար ապահովել բարձրորակ, ծախսարդյունավետ առաջնային բուժօգնություն, բարելավել բնակչության առողջության արդյունքները, ստեղծել Հայաստանում գյուղական առողջապահական ծառայության կայուն և վերարտադրելի մոդել։
Իրադարձության սկիզբն ազդարարվեց պաշտոնական ելույթներով և ՔՈԱՖ-ի հիմնադիր Գարո Արմենի ուղերձի ընթերցմամբ, ապա տեղի ունեցավ ժապավենի կտրման արարողությունը, և հյուրերը հնարավորություն ունեցան շրջայց կատարել կենտրոնի տարածքով։ ՔՈԱՖ-ի գործադիր տնօրեն Լիանա Ղալթաղչյանն իր ելույթում ընդգծեց այն առանցքային դերը, որն այս կենտրոնն ունենալու է Հայաստանի առողջապահության ոլորտում: Նա ներկաներին հիշեցրեց, թե ՔՈԱՖ-ն իր 20-ամյա գործունեության ընթացքում որքան է կարևորել առողջապահության համակարգի բարելավումը և համայնքներում իրականացրել առողջության առաջնային պահպանման ծառայությունների բարելավման ծրագրեր, վերակառուցել ենթակառուցվածքներ, վերապատրաստել մասնագետների։ Դսեղի առողջության կենտրոնի ստեղծման գաղափարը ծնվել է 2021-ի համաճարակի օրոք և, ինչպես Լիանան նշեց իր խոսքում՝ «մենք հույս ունենք՝ բոլորն առողջացած դուրս կգան այստեղից»:
Դսեղի առողջության կենտրոնում առկա է ժամանակակից լաբորատորիա, հարմարավետ խորհրդատվական և շտապ բուժօգնության սենյակներ, սպասասրահ, ինչպես նաև ատամնաբուժական առանձին մասնաշենք։ Այն նախատեսում է սպասարկել Դսեղի և հարակից գյուղական 6 համայնքի շուրջ 4,000 բնակչի։
Լոռու մարզպետ Արամ Ղազարյանը շնորհավորեց բնակիչներին և շնորհակալություն հայտնեց Առողջապահության նախարարությանն ու ՔՈԱՖ-ին այս կարևոր նախագծի համար՝ նշելով, որ կենտրոնը զգալիորեն կնպաստի համայնքում առողջապահության ոլորտում մատուցվող ծառայությունների որակի բարձրացմանը։
Առողջապահության նախարար Անահիտ Ավանեսյանը իր հերթին շնորհավորեց դսեղցիներին և նշեց, որ այս առողջության կենտրոնն արդյունավետ համագործակցության արդյունք է:
Մենք աներևակայելիորեն հպարտ ենք այս ձեռքբերմամբ և անհամբեր սպասում ենք այն դրական ազդեցությանը, որը Դսեղի առողջության կենտրոնը բերելու է իր հետ: Սա միայն սկիզբն է, մենք շարունակելու ենք հավատարիմ մնալ մեր հանձնառությանը՝ բարելավելու առողջապահության, կրթության և համայնքային զարգացման ուղղությունները:
Հետևեք ՔՈԱՖ-ի թարմացումներին և, եթե ուզում եք այս փոխակերպող ճամփորդության մաս կազմել, կատարեք նվիրաբերություն այսօր։
