Սրտանոթային հիվանդությունները (օրինակ՝ զարկերակային գերճնշում, շաքարախտ, բարձր խոլեստերին) Հայաստանում վաղաժամ մահվան հիմնական պատճառներից են, որին հաջորդում են տարբեր տեսակի քաղցկեղները: Երեխաները տառապում են մի շարք խնդիրներից՝ աճի և զարգացման խանգարումներից մինչև անեմիա և վարակներ: Հիմնվելով այս փաստերի և սեփական փորձի վրա՝ ՔՈԱՖ-ն իրականացնում է թիրախավորված ծրագրեր, որոնք ուղղված են առողջապահության նշված կարևորագույն խնդիրների և մարտահրավերների լուծմանը:

• ՔՈԱՖ-ը հզորացնում և աջակցում է Հայաստանի գյուղական համայնքների առողջապահության ոլորտի աշխատակիցներին՝ նրանց տրամադրելով բարձրակարգ բուժօգնություն մատուցելու համար անհրաժեշտ գիտելիքներ և հմտություններ՝ կենտրոնանալով սրտանոթային հիվանդությունների և մանկան խնամքի վրա: Դասընթացներից հետո իրականացվում է շարունակական աջակցություն և հսկողություն՝ ծրագրերի կայունությունն ապահովելու համար։
• ՔՈԱՖ-ը խթանում և կազմակերպում է քաղցկեղի վաղ հայտնաբերման զննումներ՝ հասանելի դարձնելով դրանք նույնիսկ ամենահեռավոր համայնքներում։

Ատամնաբուժական հիվանդությունները հանդիպում են ՔՈԱՖ-ի կողմից աջակցություն ստացող համայնքների երեխաների 99%-ի մոտ: ՔՈԱՖ-ը բազմաբնույթ միջոցներով է պայքարում այս ցուցանիշի դեմ՝ կենտրոնանալով կանխարգելման վրա, սակայն զուգահեռաբար խթանելով երեխաների ատամնաբուժական հիվանդությունների բուժումը։ Այս նպատակով ՔՈԱՖ-ը՝

• Երեխաների ատամնաբուժական առողջության առաջնային գնահատման վերաբերյալ դասընթացներ է անցկացնում ընտանեկան բժիշկների և բուժքույրերի համար, ինչպես նաև ծնողներին տրամադրում է խորհրդատվություն բերանի խոռոչի հիգիենայի մասին։
• Կառավարում է երկու մանկական ատամնաբուժական կետ՝ մեկական Քարակերտում (Արմավիրի մարզ) և Դսեղում (Լոռու մարզ), որոնք երեխաներին մատուցում են անվճար ծառայություններ։
• Իրականացնում է շարժական ատամնաբուժական ծրագիր, որը դպրոցներում երեխաներին տրամադրում է կանխարգելիչ խնամք՝ ներառյալ պարբերական մաքրումը, ֆտորացումն ու ակոսների պաշտպանիչ հերմետիկացման կիրառումը։

Մեր բոլոր առողջապահական ծրագրերն ուղեկցվում են համայնքային կրթական ծրագրերով՝ դրանց արդյունավետությունն ու ազդեցությունն ընդլայնելու նպատակով։

• Տարիներ շարունակ ՔՈԱՖ-ը «Առողջության խթանում դպրոցներում» դրամաշնորհ է տրամադրել տարեկան ավելի քան 20 դպրոցի։ Յուրաքանչյուր մասնակից-դպրոց ունի դասընթացավար, որը ՔՈԱՖ-ի կողմից կազմակերպված ստանդարտացված վերապատրաստում է անցնում, այնուհետև իրականացնում դպրոցական առողջապահական կրթության ծրագրի դասավանդումը։ Ծրագրի շրջանակն ընդգրկուն է և ներառում է ատամնաբուժական առողջություն, սննդակարգ, ընդհանուր հիգիենա և առողջ կենսակերպ ու շատ ավելին։ ՔՈԱՖ-ի կողմից մշակված այս զվարճալի և ինտերակտիվ ծրագիրը ներառում է խաղեր, միջդպրոցական մրցույթներ, հրավիրված բանախոսներ և այցեր։
• Ատամնաբուժական ծրագրերն ունեն նաև իրենց լրացնող կրթական բաղադրիչը։ Մենք դպրոցներում կառուցել ենք ատամների խնամքի հատուկ կայաններ՝ «Բրաշոդրոմներ», որտեղ երեխաները ստանում են ատամի խոզանակ և մածուկ ու սովորում ճիշտ մաքրել իրենց ատամները։ Այս ծրագիրը զուգակցվում է դպրոցներում երեխաների համար նախատեսված ատամնաբուժական առողջության և հիգիենայի ֆորմալ կրթական ծրագրի հետ։

ՔՈԱՖ-ը տարիներ առաջ սկսեց կիրառել այն մոդելը, որն այժմ ճանաչվել է որպես միջազգային լավագույն փորձ՝ ընդգրկելով սոցիալական և հոգեկան առողջության մասնագետներին առաջնային բուժօգնության թիմերում։ Այս մոդելը մեզ հնարավորություն տվեց աջակցել մեր շահառուներին իրենց համայնքներում՝ շատ ավելի վաղ, քան առողջության սոցիալական գործոնների դերը լայնորեն ճանաչվեց։

Սկսած ՔՈԱՖ-ի առաջին քայլերից Արմավիրում մինչև 2023 թվականի աշնանը Արցախի հարկադիր տեղահանման արդյունքում ձևավորված հումանիտար ճգնաժամը՝ մեր թիմերը՝ բաղկացած բժիշկներից, հոգեբաններից և սոցիալական աշխատողներից, այցելել են համայնքներ, դպրոցներ ու ընտանիքներ՝ աջակցելու և լուծումներ գտնելու նպատակով։

• Թիմերը համագործակցում են տեղական բժիշկների, բուժքույրերի, ուսուցիչների և համայնքի այլ անդամների հետ՝ ռիսկային ընտանիքների բացահայտման, առկա ռեսուրսների գնահատման և տեղի ներկայացուցիչների հետ համատեղ լուծումներ մշակելու համար։
• Մեր փորձահեն գիտելիքներն օգտագործում ենք տեղական և ազգային մակարդակներում քաղաքականության մշակման համար՝ մարզպետարանների, նախարարությունների և միջազգային ՀԿ-ների հետ համագործակցությամբ։ Այս մոդելը հնարավորություն է տալիս կիրառել համապարփակ և մարդակենտրոն մոտեցում՝ աջակցելով մեր կարիքավոր բնակչությանը և համայնքներին։