Երեկոյան 8-ի կողմերը, եթե հանկարծ հայտնվեք Վահագնաձոր գյուղի խաղահրապարակում ու լսեք, թե ինչպես են երեխաները միաձայն «Բա-թո~ւմ, Բա-թո~ւմ» վանկարկում, մի շփոթվեք, դուք տակավին Լոռու մարզի Վահագնաձոր գյուղում եք:
Պարզապես երեխաներն անհամբեր սպասում են Երևան-Բաթում գնացքի ժամանմանը:
Ամառվա ընթացքում Երևան-Բաթում գնացքը կարճատև դադար է առնում Վահագնաձորի կայանում: Այդ կարճ դադարի ընթացքում գյուղի երեխաները հասցնում են գնացքի ուղեւորներին իրենց աղբյուրի սառը ջուրը հյուրասիրել, իսկ ուղևորները երեխաներին` քաղցրավենիք:
