ՍՄԱՐԹ-ի պարի ծրագրավար Արտյոմ Սարգսյանը կենտրոն եկավ հետաքրքրությունից ու «ոտքը կախ գցեց» մինչև այսօր։
«ՍՄԱՐԹ-ի բացվելու մասին ընկերներիցս եմ իմացել։ Այդ ժամանակ սովորելուս զուգահեռ մի քանի տեղ աշխատում էի։ Բայց որոշեցի գալ ու ծանոթանալ կենտրոնին ու ծրագրերին։ Ճկուն գրաֆիկով աշխատանքի առաջարկը չկարողացա մերժել»,- հիշում է Արտյոմը, ով մի պահ միայն դադար վերցրեց ՍՄԱՐԹ-ից՝ «պետք էր ինստիտուտն ավարտել»։
Ամենաշատն Արտյոմին ոգևորում է այն, որ ինքը ՍՄԱՐԹ-ի առաքելության մաս է կազմում՝ կրթության հավասար հնարավորություն ընձեռելով գյուղաբնակ երեխաներին։
«ՍՄԱՐԹ-ի պարի ծրագրի ֆորմատն ինձ թույլ է տալիս իմ մասնագիտության տարբեր շերտեր բացահայտել ու այն ուսանողներին մատուցել ամենատարբեր ձևերով՝ սկսած խաղից մինչև տարբեր ոճերով պարի բեմադրություն»,- ասում է ծրագրավարն ու շտապում հավելել, որ ամենահավես պահը երեխաներից սովորելն է. օրինակ, թե ինչպես կարելի է ժամանակակից տեխնոլոգիաների կիրառմամբ պարը մատուցել որպես պրոդուկտ։
Արտյոմը չի սահմանափակվում պարով։ Ժամանակ առ ժամանակ նրան կարելի է տեսնել Վանաձորի տարբեր թատրոնների բեմում, որտեղ նա համատեղում է պարն ու դերասանական խաղը։
ՍՄԱՐԹ-ի պարի ծրագիրը ուսանողներին հնարավորություն է տալիս ծանոթանալու տարբեր ոճերին, ինչը, ըստ Արտյոմի, կօգնի նրանց հետագայում պրոֆեսիոնալ պարով զբաղվելու դեպքում։
Շպագատի վարպետաց դաս պարի փոքրերի խմբի կողմից։
Արտյոմը 10 տարի պարել է Վանաձորի «Հորովել» պարի պետական անսամբլում։ Հիմա միայն ուսանողների հետ է բեմ բարձրանում։
Արտյոմն իր օրինակով խրախուսում է տղաներին իրենց ուժերը փորձել նաև ժամանակակից պարում։
Առաջին մեծ դերը թատրոնում։ Արտյոմը տաքսու վարորդի է մարմնավորում Թաթուլ Բաստանչյանի «Օդանավակայան, թե դիահերձարան» (ըստ Ռեյ Կունիի «Ծիծաղելի փողեր» պիեսի) ներկայացման մեջ։
ՍԱՄՐԹ-ի թատերարվեստի ծրագրավար Թաթուլը, որ ներկայացման ռեժիսորն ու գլխավոր դերակատարն է, Արտյոմին բացատրում է բեմում «գոռալու նուրբ արվեստը»։
Պրոֆեսիոնալ դերասանների հետ աշխատանքը Արտյոմի համար կատարողական արվեստի արժեքավոր վարպետաց դաս է։
Հեղինակ՝ Քնար Բաբայան
