«Դավի՜թ, բարև։ Հունցը՞ս, կյամը՞ս խաղ անինք (Բարև՜, Դավիթ, ո՞նց ես։ Խաղա՞նք։)»,- հարցիս 3-ամյա Դավիթի դեմքին մի պահ մեղմ ժպիտ հայտնվեց, հետո նա ամոթխած դեմքը արագ թաքցրեց մայրիկի մեջքի հետևում։
Արցախի Խնապատ գյուղից Դավիթը մեկն է այն հազարավոր երեխաներից, ով հասցրել է տեսնել շրջափակում, պատերազմներ ու բռնի տեղահանում։ Նրա «բախտը մի փոքր բերել է», քանր որ մի տնից մեկ ուրիշ հարազատ տուն է եկել։ Դավիթի հայրական տատիկն ապրում է Լոռու մարզի Դեբետ գյուղու, որտեղ էլ այսօր հաստատվել է նրա ընտանիքը։
Դավիթը ՍՄԱՐԹ-ի մանկան զարգացման անկյան նորեկներից է, ով այս կարճ ժամանակում հասցրել է ոչ միայն ընկերանալ ծրագրի հոգեբան Մարինայի հետ, այլև ազատ խաղի ժամանակ հաջողացնում է վերջինիս մազերը հարդարել։ Դա երեքամյա տղայի ամենասիրելի զբաղմունքներից մեկն է։
Մի սենյակ լիքը խաղալիքներից Դավիթն ամենաշատը սիրում է վարսավիրական պարագաները, լեգոներն ու երաժշտական գործիքները։
Տնեցիք արդեն կատակում են, որ Դավիթը լավ վարսավիր կլինի։
![](https://www.coaf.org/wp-content/uploads/2023/12/53352761650_56852cccc8_k-1-1024x683.jpg)
Դավիթը մտածում է, թե այս անգամ մայրիկին ինչ նոր սանրվածք անի։
![](https://www.coaf.org/wp-content/uploads/2023/12/53352310496_62e048aa92_k-2-1024x683.jpg)
Դավիթը խանդավառվում է երկու դեպքում. երբ անծանոթ մարդիկ նրա հետ արցախի բարբառով են խոսում ու մեկ էլ, երբ ձեռքն է առնում երաժշտական որևէ գործիք։
![](https://www.coaf.org/wp-content/uploads/2023/12/53352532298_6aeae4f44f_k-1-1024x683.jpg)
Դավիթը ընկեր Մարինայի մազերը հարդարելուց բացի, նրա հետ ուրիշ խաղեր էլ է խաղում։
![](https://www.coaf.org/wp-content/uploads/2023/12/53352637139_57b20143ef_k-1-1024x683.jpg)
Երեքամյա արցախցին «ոտքի վրա, ձեռի հետ» երաժշտություն, երգ կամ պար հորինելու մեծ վարպետ է։
![](https://www.coaf.org/wp-content/uploads/2023/12/53352532163_2af2450b89_k-1-1024x683.jpg)
Իսկ հիմա Դավիթը բժիշկ է։ Պացիենտի ժպիտը վկայում է, որ ինքն ապահով ձեռքերում է։
![](https://www.coaf.org/wp-content/uploads/2023/12/53352532208_da43e8925d_k-1-1024x683.jpg)
Դավիթի ավտոների հավաքածուն Դեբետում է թարմացվել։ Մայրիկը՝ Ծաղիկը, ասում է, որ այնքան հապշտապ են դուրս եկել գյուղից, որ չեն հասցրել ոչ մի խաղալիք իրենց հետ վերցնել։
![](https://www.coaf.org/wp-content/uploads/2023/12/53352637544_dcc7dac170_k-1-1024x683.jpg)
Դավիթը հայրիկի՝ Հովհաննեսի հետ իր նոր տունն է վերանորոգում։
![](https://www.coaf.org/wp-content/uploads/2023/12/53352761735_a235c472d6_k-1-1024x683.jpg)
Երեխաների միջազգային բարբառը խաղն է։