Պատկերացրու քեզ՝ շրջապատված Լոռու չքնաղ լեռներով, որտեղ ցնցող բնապատկերն ու վառ մշակութային կյանքն ապրում են կողք-կողքի… Այ հենց այդպիսին էր արվեստի, արհեստի ու երաժշտության ՔՈԱՖ փառատոնը, որն իր շուրջ համախմբեց 5,000 այցելուի՝ տարածաշրջանը դարձնելով անմոռանալի տպավորությունների պարտադիր ուղղություն։
Բացահայտելով լոռեցիների տաղանդները
![](https://www.coaf.org/wp-content/uploads/2023/10/53228981810_6a3d9c08a0_k-1-1024x683.jpg)
Լոռու ՍՄԱՐԹ կենտրոնում տեղի ունեցած ՔՈԱՖ փառատոնը հենց Լոռու մասին էր: Միջոցառման շրջանակում 30 արհեստագործներ հնարավորություն ունեցան ցուցադրել սեփական արտադրանքը լայն լսարանի։ Այդ օրը մեր հյուրերին առաջարկվեց նրբաճաշակ ձեռագործ աշխատանքների և տեղական համեղ մթերքների լայն տեսականի, ինչը հնարավորություն տվեց իրապես խորասուզվել Լոռու մշակույթի մեջ:
Արվեստ, որը դիպչում է սրտիդ
![](https://www.coaf.org/wp-content/uploads/2023/10/Untitled-design-87.gif)
Փառատոնի կարևորագույն իրադարձություններից էր Արդեանի գեղարվեստական ինստալյացիայի բացումը, որը մշտապես ներկայացված կլինի Լոռու ՍՄԱՐԹ ավանում՝ լրացուցիչ հմայք հաղորդելով դրան: Այս բացօթյա ինստալյացիան բաղկացած է 12 արվեստի գործից, որոնցից յուրաքանչյուրը ոգեշնչված է այնպիսի վանքերի մոտիվներով, ինչպիսիք են Ախթալան, Սանահինը, Հաղպատը, Հնեվանքը, Օձունը, Բարձրաքաշի Սուրբ Գրիգոր վանքը և Քոբայրը: Երկկողմանի արվեստի գործերն առանձնահատուկ հմայք են հաղորդում տեղանքին՝ յուրօրինակ կերպով ծանոթացնելով Լոռու ավանդույթներին ու պատմությանը: Իսկ մութն ընկնելուն պես լուսավորվում են այնպես, որ դրանց կողքով անտարբեր անցնել ոչ մի դեպքում չի ստացվի։
Երաժշտական բացառիկ հնչյուններ
![](https://www.coaf.org/wp-content/uploads/2023/10/Untitled-design-88.gif)
ՔՈԱՖ փառատոնը միայն արվեստի ու արհեստի մասին չէր, էլ ի՞նչ միջոցառում առանց երաժշտության։ Մեր փառատոնային ամբողջ օրվա ընթացքում կենդանի կատարումներով հանդես եկան Հայաթ Փրոջեքթը, Լավ Էլին, Միքայել Ոսկանյան և ընկերներ բենդը, Վահագն Հայրապետյան տրիոն, Բամբիրը և DJ Ալեն Հերցը։
Լոռին՝ քո հաջորդ ուղղությունը
![](https://www.coaf.org/wp-content/uploads/2023/10/53214849251_6008aed1eb_k-1024x683.jpg)
ՔՈԱՖ փառատոնը Գերմանիայի միջազգային համագործակցության ընկերության և «ԵՄ-ն բիզնեսի համար» նախաձեռնության աջակցությամբ իրագործվող «Լոռին՝ քո հաջորդ ուղղությունը» նախագծի մի մասն էր միայն։ Մեկնարկելով 2021 թվականին՝ այն հասցրել է ուշագրավ արդյունքներ գրանցել։
- «Սթարմուս» միջազգային փառատոնի անցկացում Լոռու Դեբետ գյուղում։
- Տարածաշրջանում 16 նոր արշավային և հեծանվային երթուղիների մշակում։
- Մասնագիտական վերապատրաստման ծրագրերի իրականացում տեղի զբոսաշրջային ծառայություններ մատուցողների համար
- Լոռու Մ6 մայրուղու վրա Այցելուների կենտրոնի և «Կանյոն» սրճարանի ստեղծում, որը ճանապարհորդներին հնարավորություն է տալիս ստանալ զբոսաշրջային տեղեկություններ, օգտվել ճանապարհային սրճարանից, ավտոկայանատեղիից, զբոսաշրջային սարքավորումների խանութից, գերարագ ինտերնետից, բանկոմատից և այլն:
ՔՈԱՖ Կոնցեպտի՝ Հայաստանի խոշորագույն սոցիալական ձեռնարկության պաշտոնական բացում
![](https://www.coaf.org/wp-content/uploads/2023/10/Untitled-design-89.gif)
Նույն օրը ՍՄԱՐԹ ավանում տեղի ունեցավ նաև ՔՈԱՖ Կոնցեպտի հանդիսավոր բացման արարողությունը: Այն ներառում է բուտիկ հյուրանոց, համագումարների ընդարձակ կենտրոն և ժամանակակից ռեստորան, որոնք բոլորը միտված են Լոռու տնտեսական և զբոսաշրջային աճին:
Կոնցեպտը շարունակաբար հզորացնում է Լոռու բնակիչներին՝ նրանց առաջարկելով վերապատրաստման հնարավորություններ ու նոր աշխատատեղեր։ Եվ, որ ամենահրաշալին է, ողջ շահույթը վերաներդրվում է ՔՈԱՖ-ի կրթական ծրագրերում՝ տարածաշրջանի երեխաներին ապահովելով որակյալ կրթության հնարավորություններով:
Դե ուրեմն արի՛ Լոռի ու պատրաստվիր գրկաբաց ընդունելության և անմոռանալի տպավորությունների: